抄錯水錶亂收費 責任外判太兒戲

一提起水務署，好多人都猛Fing頭，事關香港三頭兩日就爆水管，搞到馬路變河流，令市民寸步難行不特止，仲浪費大量公帑，等於每年將七億元倒入鹹水海。難怪有人建議將水務署改名水皮署。

佢哋都冇講錯，水務署做嘢唔嗲唔吊，水皮到唔使恨。嗱，就連抄水錶咁嘅眼見工夫都搞到一鑊泡。申訴專員公署接投訴接到手軟，忍無可忍下，發表報告狂炳水務署唔負責任。

又難怪申訴專員咁慶嘅，水務署真係爭唔落。比如有位投訴人嘅物業已空置咗半年，但仲收到水費單，盛惠九百大元。佢檢查水錶，發現水錶編號同水費單上嘅唔一樣，實際用水量又比水費單少九百幾度。原來外判承辦商將水錶同另一個單位調亂咗，水務署冇派人查核就照派水費單，令用戶咁多年嚟一直交貴水費。

另一宗個案亦好離譜，投訴人單位嘅居住人數由四人減到兩人，但係水費冇明顯變動，於是提出質疑，水務署派人去現場檢查，先至發現配錯咗水錶。

點解成日會張冠李戴嘅呢？事關水務署將安裝水錶嘅工作外判畀承辦商之後，就關人個關，冇核實承辦商提交嘅資料就照收水費，有乜法子唔錯吖。所以申訴專員直斥水務署：外判工作唔應該將責任都外判埋。

講開又講啦，將責任外判呢家嘢，絕對唔係水務署嘅專利。家陣潮流興外判，個個政府部門都爭住做，無他嘅，外判好處多吖嘛，一來可以益自己友，二來唔使孭鑊，出咗事有承辦商頂住。

嗱，本港部分公廁臭氣熏天，其實就係外判責任嘅結果，食環署將清潔工作判上判，又懶得檢查，搞到負責清潔嘅人得番雞碎咁多錢，惟有慳得就慳，唔夠錢買清潔劑，就用水溝稀，最後乾脆用清水「裸洗」。咁搞法，臭氣未除事小，公廁淪為細菌孳生地事大，沙士襲港嘅慘劇分分鐘重演。

不妨再舉多個例子，近年公共屋邨升降機事故頻生，就係因為機電工程署同房屋署將升降機安全嘅責任推晒畀承辦商，連最起碼嘅檢查監督都欠奉。更弊嘅係，出咗咁多事，佢哋仲唔肯吸取教訓。嗱，早幾日深水埗又發生恐怖飛事故嘞，部急墮四十層再急升四十層，嚇到啲居民鼻哥窿都冇肉，好在冇搞出人命啫，否則睇班官老爺點收科。叮！

所以申訴專員直斥嗰啲將責任都外判嘅部門抱短視心態，一味怕麻煩，令市民感到沮喪。總而言之，即使將工作外判，但監督檢查嘅責任絕對唔可以外判，如果連責任都外判嘅話，仲要政府部門做乜呀，不如摺埋佢罷啦。叮佢個鎯鎯！