政情：哪吒情歸經濟動力?

區議會選舉在即，各大政黨都為下年嘅選舉做好部署，首要之務係搵好區選樁腳。西貢區議員方國珊（哪吒）啱啱退出富貴黨，傳聞唔少建制黨派都向佢招手，包括建仔、經濟動力同新民黨，哪吒真係有幾分皇帝女唔憂嫁嘅味道，不過佢並冇吊高嚟賣，反而好快表明意向，尋日明言建仔太親政府，經濟動力似乎啱key啲！

諷建仔親政府

哪吒同富貴黨「離婚」冇耐，雙方連身家都未分，好似佢喺將軍澳嘅街板就未嚟得切更正，但政圈英雄帖相繼飛至，仲盛傳建仔邀佢蟬過別枝添。不過，哪吒覺得自己嘅形象較為敢言，未必每事都撐政府，以擴大堆填區一役為例，佢出盡九牛二虎之力去反對，甚至換嚟政府唔再搵佢做環境及保育自然基金嘅節能項目審批小組委員，但建仔就畀人親政府嘅感覺，加上黨內人才濟濟，佢似乎擔心過到去變成滄海一粟，唔受重視。

咁經濟動力又點呢？佢似乎情有獨鍾，一時話對方十分之關心佢，一時又為經濟動力澄清佢哋唔反對直選，而佢入到去正好為自己另闢天地，又話佢哋有行會成員加鄉事網絡，總之就讚到天上有、地下無。至於新民黨，哪吒就覺得佢哋成立冇耐，連區議員都只得一千零一個，地區工作尚待發展。咁講，佢對風火輪會踩去邊都唔使估喇啩！