政情：葉劉寸兩司長口才渣

新民黨主席葉劉淑儀由官場轉戰政圈之後，寸人風格冇改過，尋日佢出席一個電台節目，原本就係同大眾分享吓對中國嘅情懷，兼且講吓自己同內地溝通嘅嘢，但葉劉講講吓都轉咗去暗寸高官，佢話自己普通話水平唔錯，亦唔似「某啲司長」要睇稿先講到嘢。到底佢寸緊政務司司長唐唐吖，定係普通話水皮嘅財政司司長鬍鬚曾呢？

回憶起中英談判期間，葉劉話佢係香港第一批同中央交涉回歸細節嘅官員，仲曾經畀內地官員要求佢即席致辭，結果佢硬着頭皮打天才波應付過去，唔使好似「某啲司長」咁要睇稿先講到嘢。咁有骨嘅說話，到底寸緊邊個呢？

曾開名話唐唐冇進步

平時聽慣葉劉痛罵高官嘅朋友一定會估到，較早前唐唐喺立法會內務委員會寸盡各黨派議員嘅時候，葉劉已經指名道姓話唐唐「做七年官都冇進步」，如果唔係有人寫好篇稿畀佢，就會成日「廢噏」，今次再斬多二両，可見佢對有啲官員真係好睇唔過眼噃。