政情：郭炳湘伴紅顏歎溫馨越菜

新鴻基地產前主席郭炳湘同紅顏知己唐錦馨（Ida）嘅關係已經係公開嘅秘密，但兩人甚少一齊露面，畀傳媒捕捉到一齊嘅鏡頭更加少有。喺啱啱過去嘅禮拜日夜晚八點幾，我哋就喺新地旗下嘅尖東帝苑酒店撞正呢對城中來頭最勁嘅緋聞男女公開露面，佢哋同一位男友人一齊去酒店三樓嘅越南餐廳Le Soleil食晚飯，席間郭炳湘同拍住坐嘅Ida傾談唔多，關係盡在不言中。

聖誕佳節又到，呢個時候最啱同至愛嘅人或好友溫溫馨馨咁度過，行吓尖東、再甜蜜歎番餐更加正。禮拜日晚八點幾九點，帝苑Le Soleil就有貴客光臨，酒店經理、侍應等一陣忙亂，眾人好恭敬咁迎接突然現身嘅郭家大少，最特別嘅係平時行蹤低調嘅Ida赫然跟隨在後，當時好多食客都被騷動驚擾。

當晚天氣有些少寒意，Ida着咗件深色毛領褸襯埋頸巾，佢一入座就除低件褸，一頭俏麗短髮加上副眼鏡，顯得好斯文淡定。久未露面嘅郭炳湘就着住成套西裝，但冇打呔，神態輕鬆。佢哋落落大方咁拍住坐，同坐喺對面嘅男友人隨意傾談，氣氛好自在。

一動一靜關係似親人

郭炳湘早前接受我哋訪問時，曾坦然回應佢同Ida係識咗二十幾年嘅「好朋友」，又讚佢成熟、識避嫌、唔求名利，唔明點解外界揣測佢意圖沾手新地業務，字字句句都好維護呢位紅顏知己。

當晚兩人嘅表現又的確似足親人。Ida對正進行局部裝修嘅酒店感到好奇，成日東張西望、指手畫腳，動作比較多，郭炳湘就沉靜少言。禮拜日嘅晚上，城中風頭最勁嘅一對緋聞男女，就係咁樣靜靜度過。