短打長擊：支持申亞 重賞金牛

港府為達到申辦二○二三年亞運會目的，不惜死纏爛打。追女仔光死纏是不夠的，要膽大心細面皮厚，港府只落得面皮厚，膽大心細卻欠奉。

申亞開支是無底深潭，立法會議員倒有前瞻性，深恐一旦通過撥款，會對不起納稅人。立法會已通過一項無約束力的擱置申亞動議，但港府仍然永不言棄，係都要申亞，憑甚麼？憑阿Q精神？筆者想起一則微小說：一個美國人和中國人聊天，美國人說：「我們國家挺自由唄，啥都敢說。我敢在白宮外面大喊『奧巴馬下台』，你們敢嗎？」中國人說：「有甚麼不敢的？」說完，走到故宮門前大喊：「奧巴馬下台！」

港府說，若香港申亞，中央一定支持。鬼唔知咩！這無底洞係香港人自己填，講一聲支持有何困難，連民建聯主席譚耀宗都話：這是中央一向的態度，香港的任何決定，中央都會支持。

之不過條數係香港孭，港府申亞預算如海鮮價，日日不同，一時四百多億，一時六十億，一時又話唔記得加埋通脹，係八十億、九十億……聽到你「短路」！

你想別人改變觀點，自己都應該調整角度啦，以下故事可供德成局長參考：一位教徒祈禱時犯煙癮，問神父：祈禱時可以抽煙嗎？神父瞪了他一眼說：不可以！另一教徒祈禱時也犯煙癮，他問神父：抽煙時可以祈禱嗎？神父讚賞地說：可以！

觀乎港府在申辦亞運上，觀點死牛一邊頸，卻又患了高官死症──無牙力！角度愈調愈唔對焦。筆者獻計：凡支持申亞者，可得金牛十張！