今日未過講明日 道是有晴卻無晴

財政司司長曾俊華話自己唔係「視帝」，佢有冇潛質食演藝呢行飯好難講，但的而且確有鋪做戲癮，唔係點會連續三年扮新潮，上演「明日動漫騷」推銷財政預算案吖。

鬍鬚曾喺個人網誌透露，今年會食過翻尋味，繼續用漫畫古仔呼籲市民為財政預算案提供意見。主角仲係用咗兩年嘅「日仔」，情節亦冇乜新意，講日仔啱啱離開校園投身社會，搵工作波折重重，仲有家庭嘅壓力。不過，因為善用資源同得到家人支持，最終可以渡過難關咁話。

日仔福大命大，有驚無險，連古仔個名都起得零舍誇張，叫《擁抱明日，信有晴天》喎。鬍鬚曾前年第一次出漫畫推銷預算案，書仔叫《明日．今天的未來》，唔知頭唔知路仲以為係小學生作文添；舊年嗰本好行貨，叫《今日工程，明日繁榮》，總之明日復明日，明日何其多。

叮！鬍鬚曾首「明日歌」唱足三年，香港人等足三年，捱足三年，見唔到未來，睇唔到繁榮，晴天估計都冇乜希望咯。講真，對大部分市民嚟講，通脹猛於虎，貧富懸殊愈來愈犀利，分享唔到經濟復甦成果，仲要面對物價不斷上漲，日子慘過王小二過年，唔止一年不如一年，簡直一日不如一日。今日都唔知點過，邊有心機諗明日吖；晴天唔使旨意喇，日日陰天就真。

呢，樂施會針對非綜援貧窮長者生活及健康狀況嘅調查發現，受訪者普遍入不敷出，每月平均開支三千九百幾蚊，但收入只得三千三百幾蚊，個個月都要食穀種，靠積蓄補貼至勉強維持生活。申請綜援又點？手續繁複不特止，仲要求仔女簽「衰仔紙」，而且通常被家人拒絕。呢啲就叫晚景淒涼嘞。

綜援安全網殘缺不堪，公公婆婆老無所依，老人家執紙皮賣汽水罐通街都見。甚至有長者為咗慳錢，要到公廁飲水喉水。前日立法會討論全民退休保障，有團體用「家家有白燕，滿街張活游」形容本港貧窮長者嘅生存狀態，真係聽到都心酸。

弊在政府孤寒縮骨到冇朋友，就算財政儲備爆燈，庫房水浸，都唔肯開倉派米接濟窮人。鬍鬚曾仲離譜，每次做財政預算案都玩「狼來了」，靠誇大赤字嚟減低市民對派糖嘅預期，繼續刻薄低下階層。

好似今年初公布嘅預算案咁，鬍鬚曾估計赤字超過二百五十億元，結果呢？有國際知名會計師行計過數，今個財政年度唔止冇赤字，仲可能有七百幾億元盈餘添，正負相差近千億，你話係咪離譜吖。

烏龍財爺早排老土當有趣，出咗個題目為預算案「徵求民意」：如果你係財爺會點辦？叮！好易辦啫，庫房水浸，官富民貧，廢話少講，速速派糖，就係咁簡單！