SUN世代：愛陪三子女朗誦 幸福滿瀉
金融業隨時百萬、千萬元上落，Johnny工作非常忙碌，要緊貼大市情況，但他並非工作狂。每個星期他都會抽兩日享受天倫之樂，與八歲女兒、六歲及四歲兒子三個寶貝玩遊戲、跟功課，認真廿四孝爹哋，「陪屋企人就係我嘅嗜好！」
「小朋友呢個年紀好緊要，一定要擺時間相處。」為訓練小孩的自信心，他以角色扮演形式和三子女練習朗誦，「成家人會輪流做評判，叮一聲，就要開始朗誦，完咗就掌聲支持！」Johnny臉上幸福滿瀉：「唔係認叻，佢哋喺唔少公開比賽都拎冠軍㗎！」Johnny一家人亦會學烹飪煮布甸，「冬天去放紙鳶、踢波，夏天就游水。」