繼「鋼琴王子」郎朗後，中華總商會會長蔡冠深位於山頂道嘅大宅琴心園（Chateau de Piano）又搞音樂家宴，當晚冠蓋雲集，連諾貝爾獎得主楊振寧夫婦、霍英東集團主席霍震霆亦係座上客，更有四場唔同嘅音樂表演，有香港節慶管弦樂團音樂總監李承謙率領四名學生演奏，又有靚女鋼琴家余嘉露表演。由蔡太一手包辦嘅自助式美酒佳餚當前，又有悠揚樂聲伴隨，賓客都盡興而歸。
楊振寧伉儷（左三、四）同蔡冠深（右三）一家私交甚篤，碰面當然影番張大合照。 （蔡冠深提供圖片）
