政情：搞搞政：鬍鬚曾嘥錢續玩漫畫諮詢

財爺鬍鬚曾兩年前引入漫畫嚟諮詢預算案，畀班立法會議員鬧爆嘥公帑嚟做形象工程，但今年又再嚟，擺明當議員嘅批評係耳邊風，繼續倒公帑落海。

漫畫嘅主角係日仔，但有幾多市民真係知道有日仔嘅存在？鬍鬚曾尋日喺網誌度繼續推銷，話日仔又再出場。前年超現實喺未來返到金融海嘯年代嘅日仔，舊年變身大學生，今年漫畫以《擁抱明日 信有晴天》為題，日仔火速大學畢業，但喺求職路上遇到挫折，加上家庭壓力，一度心灰意冷，最後憑對未來嘅信心，終於渡過難關，仲積極參與一場關係到自己未來嘅比賽。講就易，現實嘅係青年失業率就唔見回落喎！

再講，社會上有好大聲音要求政府成立全民退休金，照計鬍鬚曾仲有兩年任期，若果佢繼續以日仔漫畫嚟諮詢預算案，以日仔嘅成長速度，到時應該變咗阿伯，咁鬍鬚曾又會唔會聽民意成立全民退休金，畀日仔都有退休保障呢？否則，咪又係齋噏。