政情：鄧鉅明限量版名錶博升值

太子珠寶鐘錶主席Jimmy鄧鉅明現身馬場，見Jimmy手上戴咗隻Cartier Santos 100 Squelette鏤空腕錶，隻錶屬限量版，賣點係羅馬數字造型嘅特殊機芯設計，喺兩片藍寶水晶之間，可以清晰地睇到內裏一百三十枚手製零件，錶價三十多萬港元。隻錶升值潛力高，Jimmy梗要留隻畀自己。

轉頭見到開達集團主席丁午壽，佢旗下嘅「晨速」尋日出戰，主人以黑超Look嚟打氣，造型確係少見。聖誕快到，向來喜歡外遊滑雪嘅佢，今年卻留港同家人擦聖誕大餐。食火雞？非也，係為咗佢最愛嘅藍芝士Blue cheese。

藍芝士係因獨特發酵方法同加工程序而出現青藍色條紋嘅芝士，香氣特濃，且帶辛辣口感，一般人未必接受，但佢就恨到流晒口水，仲話明知肥幾磅都要擦餐勁。

鄧鉅明珍藏Santos限量版錶款，價值三十多萬元。