政情：天文會長小行星贈沈祖堯

尋日中文大學舉行開放日，亦係好事成雙嘅日子，皆因香港天文學會會長楊光宇將自己發現嘅兩顆小行星送咗畀中大。因為楊光宇喺外地，冇出席開放日，但中大就播咗佢早前錄影嘅短片。

楊光宇喺片段中話，因為睇咗新亞書院嘅話劇，被中大嘅教育理念感動，加上好欣賞校長沈祖堯喺沙士期間嘅貢獻，所以將自己發現嘅小行星命名為「博文約禮星」（88878 Bowenyueli）同「沈祖堯星」（88879 Sungjaoyiu），今年中先得到國際天文聯會批准。佢仲講笑，既然送粒星畀中大，順手送埋畀校長喎。沈校長坦言唔係好認識楊光宇，收到咁大禮都好驚訝。佢好感激楊光宇對中大嘅感情，但亦好謙虛咁話，覺得自己唔配同中大相提並論喎。

沈祖堯獲贈小行星，佢感到好驚訝。