政情：哪吒自爆獲三黨拉攏
自從宣布退出富貴黨後，西貢區議員「哪吒」方國珊嘅去向未明，先後傳過有啱啱喺上個禮拜至成立嘅新民黨同經濟動力向佢招手。
哪吒尋日陪契媽入馬場，講起新民黨有意拉攏佢，佢直認真有其事，仲透露經濟動力同建仔都搵過佢。至於會泊邊個碼頭，佢賣關子話：「我暫時係獨立人士。」至於曾栽培佢嘅富貴黨，佢就話再見亦是朋友喎。佢又語帶雙關話，「要爭取支持，唔可以單靠派嘢。」富貴黨前排又派暖風機又派雞，哪吒咁講，矛頭好明顯喇！
入黨有乜好處？哪吒心中有數喇！一來人手足，二來資源夠，點計都好過單打獨鬥。以建仔嚟講，喺新界東爭上位嘅人已夠擠擁，如果哪吒考慮加入建仔，佢可能甘願暫時只係選區議員而唔係立法會議員喎。