政情：白鴿黨家變林公公扮無辜

呢排政壇真係多事之秋，繼富貴黨同民協「家變」後，白鴿黨尋日亦「家變」，包括由改革派牽頭另「起朵」嘅新民主同盟在內嘅三十名黨員，喺黨改選領導層之前贈興，以啃唔落黨轉軚支持政改方案集體退黨。

既然班黨員口口聲聲話係因為黨高層喺政改方案妥協先退黨，咁當然同政府扯上關係，政制及內地事務局局長「林公公」林瑞麟尋日出席公開活動後，即刻畀傳媒捉住問點睇白鴿黨「家變」單嘢？林公公話相信喺香港咁自由、開放嘅社會，唔同黨派有唔同嘅重組同變更係自然現象。講到好似完全唔關佢事咁喎！

廢噏詳細考慮深思熟慮

跟住有記者問有黨員退黨係咪白鴿黨為支持政改方案付出好大嘅代價？林公公就話相信每個政黨都係經過深思熟慮……有記者再問有人話喺支持政改方案一事中，白鴿黨畀政府擺上枱？佢話政府喺今年六月最終採納咗一人兩票方案，係經過好詳細考慮……。政府係依照喺六月時與唔同黨派相互嘅理解嚟辦事，並提出本地立法嘅方案，將呢件事落實。

嘩！講到咁，好明顯佢否認擺白鴿黨上枱，仲拉埋其他黨派落水喇。有記者追問有啲人覺得政府今次好似係陷白鴿黨於不義，為咗支持政改搞到有人退黨，咁佢係咪同意呢個講法呀？點知林公公又話：「我認為唔同嘅黨派係經過深思熟慮作出判斷，佢哋亦係非常負責任嘅政黨。」

唉！唔係「詳細考慮」，就係「深思熟慮」，林公公又再發揮「人肉錄音機」本色。為乜？原因只有一個，就係唔關政府事，政府冇搞到白鴿黨家變啫，但係無論講幾多次，都催眠唔到市民㗎，因為事實就係白鴿黨確實係轉軚撐政改囉！