基建統統大白象 亞運點會唔超支

港府冇嘢叻，最叻呻窮。有人要求派糖扶貧，高官就問錢從何來；有人要求改善老人福利，高官就話負擔沉重。係唔係o架？

開講有話，信佢一成，雙目失明。港府唔係窮，而係孤寒，應使嘅唔使，唔應使嘅就亂咁揈。呢，環境局舊年向立法會申請十六億七千萬元，話要喺啟德發展區興建區域供冷系統，殊不知，相隔短短一年，環境局又再攤大手板，申請追加撥款，而且一追就追加一倍幾，總共要三十六億五千萬元先至夠找數，你話係咪混帳吖。

正如立法會議員話齋，當局計算工程費一味靠估，呢個所謂供冷工程嚴重超支，遲早淪為大白象。話時話，議員絕對唔係杞人憂天，事關港府估數字冇一次準，而且愈錯愈離譜，搞到大白象工程愈來愈多，數都數唔晒。

例如，當局日前公布蓮塘口岸最新估價，比原本預計升三成至一百一十二億元；又例如，廣深港高鐵香港段造價，最早預計只需一百七十億元，申請撥款時變咗近七百億元；再例如，港鐵南港島線工程原先估計造價七十億元，卒之又要調高到百幾億元，超支逾五成……

一隻大白象、兩隻大白象、三隻大白象……如果大家夜晚失眠又唔想數綿羊嘅話，不妨搞搞新意思，改為數大白象。不過數還數，千祈唔好諗起自己係納稅人，唔係好易發噩夢o架，叮！

有人問，港府次次估錯數，究竟係數學水皮呀，定係故意嘅呢？計太一叮話齋，兩樣都係，大家只要睇吓預算案年年都預算到離題萬丈，就知道佢哋嘅數學係幾咁渣。至於話故意估錯數咯喎，亦唔係冇道理o架，首先報細數，等立法會比較容易通過撥款，然後再申請追加，到時打死狗講價，無論超支幾多，立法會都要焗住放行喇。

唔怪得愈來愈多人擔心，申辦亞運到頭來可能變成另一隻大白象，港府聲稱用六十億元搞亞運，根本係呃鬼食豆腐。其實，申辦亞運究竟要用幾多錢，當局自己都矇查查，撇開間接開支唔計，淨係直接開支就變來變去，一時話要一百四十五億，一時減到六十億，依家又變成九十幾億，總開支高達五百五十幾億。而且呢啲係目前嘅預測，到時又會超支幾多，你唔知，高官亦唔知。

有議員踢爆，當局提出嘅五百幾億元總開支，係根據每年百分之二至百分之五通脹率保守估計，如果改為國際慣用嘅百分之二十建築成本通脹推算，最後埋單計數隨時超過一千億元，問你怕未！

最好笑嘅係，民政事務局局長曾德成好老定咁話，如果申亞經費唔夠，到時會向社會籌募喎。叮！當年舉辦東亞運唔夠錢就話向商界籌募啫，亞運隨時超支幾百億，點籌募吖？成個關愛基金揼晒落去都唔夠啦！

一句講晒，冇咁大個頭，就唔好戴咁大頂帽，申辦亞運？早抖啦！