政情：大輝自爆係C18大水喉
政壇動作多多，唔少都瞄準出年嘅區議會選舉。立法會廠商會代表林大輝籌組嘅C18（社區十八）成立將近半年，召集人林大輝尋日同多位成員出席電台節目時，強調旗下成員好多都係基層出身，仲自爆C18經費係由佢包底添。
大輝過去一直無清楚交代C18嘅經費來源，但尋日對住一班政壇新秀就好坦白話：「作為召集人，喺經費上係責無旁貸，經費係來自本人！」此言一出，在場人士無不嘩然，至於大輝背後仲有冇人支持就唔知嘞。成員之一嘅沙田區議員湯寶珍都加把嘴：「大輝出雞，我哋都要出豉油㗎！」講到近期基層被指有仇商情緒，大輝就話，本港百分之九十八都係中小企業，多數老闆係草根出生，相信仇商情緒只係個別事件。
