政情：搞搞政：建仔水浸年吸6000萬
立法會大黨民建聯尋日舉行第十八次會員大會，席間都通過佢哋嘅財務報告，身為本地最有錢政黨嘅建仔今年使咗幾多錢？答案係總支出為六千四百一十八萬元，而佢哋嘅收入則為六千四百八十萬元，比去年吸多二百萬元，政黨以籌款為主，建仔喺金融海嘯後都可以年吸六千幾萬，不愧為吸水力超強嘅高手。
主席譚Sir譚耀宗話，今年佢哋多咗辦事處、多咗人手。總之一闊三大喺喇，不過，建仔吸水冇難度，淨係呢一點都傲視城中政黨啦，照咁睇，明年本港舉行區議會選舉，建仔庫房嘅「水浸」程度應該有增無減嘞。
講到過去一年工作時，建仔又重申對港府政策一向係「是其是，非其非」，仲大講三件同政府唱對台嘅事，包括將軍澳堆填區擴建計劃、復建居屋，同最近嘅申亞一事，話到時建仔同政府唔係下下同一陣線㗎，民意喺邊度，建仔就企硬喎，呢啲說話到底講畀邊個聽呢？公開同港府劃清界線。至於政治歷史名詞「執政聯盟」，譚Sir梗係半粒字冇提啦。
設計圖片