政情：梁君彥返立會順便睇禮物
邊個話男人唔鍾意行街？上周三立法會開大會，晏晝四點就見到經濟動力嘅梁君彥（Andrew)喺中環ifc行人天橋附近，佢沿天橋行到太子大廈，再行返立法會，似係返去開會，但行過路過，有啱嘅嘢都唔好錯過。Andrew一邊行，經過個人護理產品店、超級市場同影音店舖都不時停步睇吓嘢。
Andrew先去到太子大廈三樓「萬寧」睇貨品，睇睇吓仲踎低身細心研究，大約三分鐘後無買任何嘢離開。跟住落咗二樓，去到Oliver's超級市場時，佢又喺葡萄酒區睇紅酒及做特價嘅禮盒裝法國香檳，莫非想買聖誕禮物？十分鐘後，佢又移步去咗一間雷射影音店門外，雖然都冇斬獲，但喺會議中偷時間行街都不失為減壓奇招。
離開太子大廈時落緊雨，佢特別行落港鐵站，沿地下通道行到最近立法會大樓嘅出口，路程雖然遠啲，但唔使濕身，又可以趁機做運動。
