政情：百仁搵名醫治半癱女童
由城中富豪二、三代組成嘅百仁基金，成立兩年半以來定期有探訪活動，百仁基金主席施榮忻尋日又出動，聯同副主席楊華勇及林智彬、會員莊家蕙及鄭詩韻，一齊前往探望一名患上腸病毒而下身半癱瘓嘅三歲女童李欣樂，最後決定運用百仁基金會員喺內地嘅人事脈絡，尋找理想嘅中醫師為欣樂治療。
現年三歲嘅李欣樂居於葵涌石蔭東邨，與父母、弟弟及祖父母同住，欣樂兩年前跟隨媽咪返大陸，回港後突然發燒及傷風咳，兩星期仍未痊愈，證實感染EV-71型腸病毒，病毒更影響脊髓，令下半身半癱瘓，只有左腳剩餘五成活動能力。欣樂母親四出尋訪名醫，後來覓得一名中醫為欣樂針灸，病情才獲得好轉，可惜醫療費高昂，令欣樂一家頓感徬徨。百仁基金最近透過社工獲悉欣樂嘅不幸個案後，尋日帶埋果籃同兒童故事書前往探訪。
施榮忻（左四）拉隊探望下身半癱瘓嘅欣樂小妹妹。