政情：直資風暴打亂教局換班

審計署發表報告大彈直資學校帳目亂龍後，立法會政府帳目委員會隨即展開聆訊，教育局局長孫明揚同常秘黃鴻超即成立法會受靶常客，事件仲打亂教育局常秘嘅換更大計，事關政府早在上月公布咗連串官場調動，家吓黃鴻超身陷直資風暴未走得、由勞工處升職嚟接佢個位嘅謝凌潔貞又冇得上任，焗住做透明人。

謝太淪半天吊候任常秘

公務員事務局上月公布，黃鴻超會調任公務員事務局常秘，今個月二十三號返工。而佢個位就由謝凌潔貞紮職接手，不過，謝太嘅返工期就係本月十三日，照呢個宣布，黃鴻超應該喺現職做到十二號，然後放十零日假就返新工，至於謝太就喺十三日返新工。

尋日我哋喺一個中學生活動上見到謝太，本來想恭喜佢升職，點知謝太話佢依家只係「候任教育局常秘」，問真啲原來係直資風暴搞到黃鴻超要坐多一陣，可能係搞掂立法會個聆訊先啩。謝太對遲咗升職並無怨言，仲話只有天堂先至有完美呢回事，佢覺得凡間每件事都可做得比今日好，總之有工作就做啦！

說話雖然係咁講，但謝太嘅身份實在好尷尬，事關佢勞工處處長個位已經被前食物環境衞生署署長卓永興代咗，新職又未能上任，惟有做半天吊嘅候任常秘囉。

佢嘅前任黃鴻超仲慘，臨走都要畀立法會捉先受靶，依家前後幾次聆訊，都唔知完咗未，何況整單直資風暴都係佢經手期發生，第日發表報告佢都未必吟得甩。問到遲早要接棒嘅謝太驚唔驚呢單風暴，佢話一直透過電視直播留意立法會對直資風暴嘅聆訊情況，覺得成件事執行上有改善空間，而直屬上司孫明揚，亦已指示佢要小心研究審計報告嘅意見。