私隱署亂聘公關　蔣任宏火燒後欄

私隱專員個位可能特別惹火。呢，蔣任宏新官上任無幾耐就火燒後欄，爆出大花筒醜聞，連自己塊金漆招牌都燒埋，認真醜死怪。

蔣任宏履新後上個月第一次上立法會，有議員質疑佢係「五無人士」，包括本身無私隱專業知識同經驗。佢當時仲死撐，形容自己係「四有」，有能力、有熱誠、有相關行政經驗同法律知識，仲話上任以來熱誠有增無減添。

四有係真唔係冇人知，唯一可以肯定嘅係，蔣任宏無端端多咗一有，就係亂掟公帑有「吉士」。私隱專員張櫈未坐熱已經請公關公司做推廣宣傳，仲好豪氣添，最多可以畀到廿五萬。

叮！太一叮呢鋪真係抓爆頭，私隱專員公署成立十幾年，雖然正經事冇做幾多，但醜聞就一籮籮，「知名度」咁高，可以話冇人唔識，請公關公司都唔知為乜。咁都未算奇，原來蔣任宏二○○三到二○○六年任職郵政署署長嗰陣，曾經聘用同一間公司做公關。

最唔尋常嘅係，私隱專員公署採購指引並唔鼓勵採用單一招標方式，但署方呢次偏偏捨棄公開招標搵服務承辦商做法，用單一招標聘請相熟公司做嘢，係咪好奇怪呢？

立法會議員陳淑莊十分關注私隱專員公署事件，佢話：「未聽過有監察機構要請公關公司，成個程序又唔清唔楚。」認為市民對呢類機構要求甚高，蔣任宏應該有避嫌意識，否則市民會懷疑招聘程序有違規或涉及利益衝突。

亦有議員認為，同非政府組織建立定期接觸渠道，根本就係署方責任。有人權組織負責人估計，聘請公關公司其實係蔣任宏對做好自己份工冇信心。

叮！私隱專員公署今年經費高達四千六百萬元，本身已經有兩位全職員工負責資訊同公關，另聘公關公司完全係疊床架屋，係浪費公帑嘅敗家仔行為。

講真，蔣任宏任職私隱專員，市民本來就冇乜信心，佢做郵政署署長嘅時候已經有侵犯員工私隱前科。話時話，私隱專員公署究竟做到啲乜，到底仲有冇存在價值，市民心中有數。遠嘅唔提，淨係講八達通出賣客戶資料引起嘅風波，公署又係高高舉起，輕輕放下，最終變咗「零懲處」，連無牙老虎都不如，更令全城震怒。

最惡頂就係，連續幾任私隱專員都曾捲入醜聞，前副私隱專員林永康更因為詐騙公帑被判監。其實，管理混亂嘅情況喺其他公營機構分分鐘有過之而無不及，唔少機構年年成為審計署炮轟對象。

計太一叮話齋，私隱專員公署呢類成事不足、敗事有餘嘅政治花瓶，留喺度盞嘥公帑，多一個不如少一個，索性摺鬼咗佢，市民眼不見為乾淨。叮！