政情：搞搞政：民協決裂 老虎仔退黨棄選
繼富貴黨發生「家變」後，民協內部亦出現兄弟決裂，主席「老虎仔」廖成利已喺上禮拜六黨會員大會上劈炮，除提出辭去黨主席外，仲一併放棄所有議會選舉。主席一職暫由副主席、深水埗區議會副主席譚國僑署任，直到明年底新一屆區議會選出後先改選領導層。至於老虎仔嘅區議會啟德選區議席，現已交棒畀新人楊振宇接手參選。民協理應到明年底至正式換屆，老虎仔喺中途急於辭去黨主席職務，可見佢嘅不滿大爆發。
老虎仔喺八三年同KK馮檢基一齊創辦民協，九五年更當上立法局議員，但自九八年臨立會任期完結後，近三屆立法會九龍西直選只能排喺KK之後陪跑。有消息話KK多年嚟參選依靠老虎仔嘅律師專業形象，以彌補私樓中產票源不足，但係四年又四年，老虎仔睇唔到前景，惟有研究同白鴿黨合併期望殺出新血路。
點知佢錯估形勢，未有諮詢黨員意見就私自提出同白鴿黨合併，結果遭黨友大潑冷水，KK更強烈否認合併，等於狠狠向老虎仔連環摑幾巴掌。消息話老虎仔為事件感到意興闌珊，與其陪跑，倒不如放棄參選，順勢辭去主席職務，專注發展律師行業務。
