政情：華叔睇片緬懷司徒村
正喺醫院養病嘅支聯會主席司徒華，唔方便四圍去，但佢嘅黨友林子健好有心，專登去華叔家鄉開平拍低當地嘅點滴畀華叔睇，仲喺開平搵到一條司徒村，逗得華叔好開心。
據華叔講，三年零八個月淪陷期間，佢返咗開平避難，喺鄉下讀過書，而林子健嘅舅公做過華叔老師。林子健除拍片畀華叔睇，仲同華叔講喺司徒村嘅所見所聞，華叔猛話有印象。
啱啱去完挪威出席諾貝爾和平獎頒獎禮嘅白鴿黨主席「鐵頭仁」何俊仁，前日探望過華叔，話華叔精神唔錯。佢仲帶咗喺挪威買嘅兩個朱古力「諾貝爾金牌」畀華叔食，又帶咗一件由多位民運人士簽名要求釋放劉曉波嘅T恤畀華叔。
原來頒獎典禮當晚，華叔一邊睇住直播，一邊好激動咁話想去現場睇，可見華叔依然好關心社會大事。
華叔細個時喺開平嘅司徒村返學。 （林子健提供圖片）
司徒村