政情：四大商會圍插蘇錦樑

商務及經濟發展局副局長蘇錦樑任內最重要嘅工作，係要處理競爭法呢個燙手山芋，但佢屢次喺草案委員會會議中都畀商界群起攻之。據聞，早已明言對條例有保留嘅總商會、中總、廠商會同工總等四大商會，今日八點將會罕有咁團結一致，直接「上天庭」會見局長Rita劉吳惠蘭，表達業界對競爭法嘅憂慮。

據了解，四大商會之前就競爭法一事，向來都係同蘇錦樑交涉開，佢哋今次有此舉動，明顯係要向政府施壓，兼反映佢哋對蘇錦樑表現嘅不滿。

劉吳惠蘭代撲火

廠商會嘅立法會代表林大輝尋日更直言，蘇錦樑未喺商界打滾過，只係識得睇冷冰冰嘅數字，唔知業界疾苦，同佢好難溝通，仲話佢過去喺會議嘅表現好似一舊雲咁，乜都答唔到；相反，Rita向來有同商會溝通，競爭法應該由佢呢啲高層次嘅人處理先啱。大輝仲話：「我唔係階級觀念，但都要竹門對竹門，搵對等單位傾㗎！」明踩蘇錦樑未夠班後，佢又話四大商會個個老闆都係做咗二十幾年捱出頭，一人一句足以「浸死」蘇錦樑。

咁講法，即係話蘇錦樑自己份工做唔好，搞到火燒身之餘，仲要Rita幫佢四圍撲火啦！

廠商會副會長吳永嘉亦對現時政府提交嘅競爭法草案好不滿，話當中充滿灰色地帶，未能阻止大公司合併，反而令中小企動輒得咎，「最後可能捉唔到麻鷹捉雞仔」。佢話同其他商會嘅意見相近，唔排除之後會團結一致反枱。

王桂壎左右為難

有指競爭法立法後，相關嘅官司量必然有增無減，唔少人都話律師係最終受惠者，但律師會會長王桂壎就唔係咁睇嘞。佢尋日出席廠商會午宴擔任主講嘉賓時，就呻香港只係一個彈丸之地，涉及競爭法嘅官司一定唔會大得去邊，最慘係唔同組織都分別叫佢發聲，有人就叫佢出聲踩條草案，有人就叫佢唔好踩得咁勁，令佢左右做人難喎。