三成法案遭擱置 弱勢政府百事哀

香港回歸以來，特區政府民望插水，卒之搞到董建華腳痛下台。現屆政府上台後口口聲聲強政勵治，仲用高薪厚祿請咗一班副局長同政治助理，話要擴大高官問責制喎。可惜政府患嘅政治陽痿已病入膏肓，無論食幾多政治偉哥，都冇辦法硬起嚟。

有關注團體踢爆，過去五個立法年度當中，政府平均每年有三成四嘅立法建議遭擱置或押後，由○五年到依家已有近四十條立法建議被打入冷宮。食物及衞生局同環境局係重災區，只有四成立法建議可以成功立法。

因乜事會咁嘅呢？咪就係因為政府唔敢闖關囉，正如有關注團體人士指出，被擱置嘅立法建議好多都係極具爭議性嘅燙手山芋，政府怕惹起反對聲音，所以拖得就拖。

涉及中央屠宰嘅《公眾衞生及市政（修訂）條例草案》就係一個典型畸士。近年禽流感多次襲港，人人談雞色變，中央屠宰本來係個唔錯嘅對策，政府亦一本正經提出立法建議，但一睇見各方爭議不休，怕順得哥情失嫂意，就拿拿臨縮沙，一連四次擱置立法。

話時話，政府咁做真係好離譜，中央屠宰關乎全港市民嘅健康同生命安全，理應妥善解決，點可以隨便擱置立法㗎？

家家有本難唸的經，正如關注團體人士話齋，港府政治權威不足，行政立法又欠缺聯繫，建制派又鬼打鬼，管治已經面對結構性危機，所以遇到社會上反對聲音嘅時候，就即時選擇迴避，連拎上立法會首讀都慳番。

仲有，家陣政府民望超低，如果再搞出乜嘢風波，有違北大人對香港和諧嘅期望，分分鐘會重演董建華忽然腳痛嗰一幕。前事不忘，後事之師，所以政府一睇見法案挫敗機會大，就即時收番。一句到尾，保住官位最緊要，話之你對市民有冇影響啦。

政府咁樣做，令唔少本來迫切需要推行嘅政策都一拖再拖。例如港台前途問題，係人都知道，港台係政府嘅親生仔，鬧起老竇卻一啲面都唔畀。但政府對反骨仔碰都唔敢碰，反而呵護備至，仲猛開水喉泵水氹佢開心，你話係咪好荒謬呀！

除此之外，教育改革、焚化爐建設、競爭法等等立法都係有頭威冇尾陣。講真，咁搞真係好危險，事關呢啲都係施政計時炸彈，一爆起嚟，就唔止腳痛咁簡單嘞！

有學者講得啱，現屆政府抱持鴕鳥心態施政，情願將施政炸彈拖得就拖，欠缺政治力量推動新政策。嗱，咁咪就係弱勢政府百事哀囉。叮佢個鎯鎯！