政情：陳智思掌五大法定組織
「公職王」Bernard陳智思嘅公職又多一項，就係接替鄭維志，出任司法人員薪俸及服務條件常務委員會主席，任期兩年，由下月一號起生效。加埋呢個新任命，Bernard依家同係五個法定組織嘅揸弗人。
屈指一數，Bernard現時任主席嘅公職，有可持續發展委員會主席、古物古蹟諮詢委員會主席、活化歷史建築諮詢委員會主席同嶺南大學校董會主席，瓣瓣都要落手落腳做實務，依家又多一項公職，佢應唔應付得嚟㗎？點知佢話論公職數量，其實已經少咗喇，政府委任公職有「六六規條」，即同時唔可以兼任超過六項公職，同一項公職唔可以坐多過六年，佢以前嘅公職數目係啱啱好填滿晒。
Bernard話做公職，開會唔係問題，反而依家做古物古蹟同活化歷史建築，成日要外出見環保團體，先至佔據佢最多時間。