政情：孫太為女童軍爭莊傷感

香港女童軍總會嘅超齡總監邊陳之娟鐵定明年四月卸任，尋日先講過總會將喺下月八號破天荒出現新一姐「爭莊」局面，而喺報道出街後，尋日下晝不約而同有兩瓣人向我哋報料，兩名候選人即該會副總監彭徐美雲同名譽副會長李周美枝、邊太，以至早前離開總會嘅教育局局長孫明揚太太鍾小芬，全部捲入漩渦。

其中一封署名「一群總監」、貼住深圳郵票嘅掛號告密信矛頭直指孫太，指女童軍出現百年一見嘅爭位現象，聽聞係「有乾媽（某局長夫人）處處為乾女兒鋪路」，又指孫太係近月女童軍內部風波嘅策劃者，同總會職員及數位總監「一起搞陰謀」，真係講到似層層，情節精彩過電視宮闈片。根據信中上文下理，呢位「乾女兒」最有可能係指突然報名參選總監嘅彭太。

另外，一位自稱女童軍總會職員不約而同喺尋日報料，話就本報尋日嘅報道提供補充資料，指邊太喺尖沙咀一間酒店搞聚餐，邀請所有有權投票嘅女童軍高層出席，目的為李太拉票，但就冇請另一位候選人彭太。女童軍總會發言人就話，尋日係會員聚會，邊太唔係搞手，李太確有出現，但彭太就因為事忙冇到，佢堅稱呢個唔係拉票活動。「職員」同「一群總監」明顯嚟自唔同陣營，但一樣心有靈犀，同時告密，好有理由相信佢哋真係嚟自同一個大家庭。

我哋打電話問孫太，佢高呼冤枉，話自己冇契媽亦冇契女，更加冇諗過爭位，女童軍本來係教導班女孩子做一個對社會有貢獻、敢承擔嘅地方，依家變成咁樣，令佢好傷感。孫太又話辭晒女童軍所有職務，就係想耳根清淨，遠離煩擾，佢希望放箭人唔好再搞佢，亦無謂再為一姐之爭起爭拗，選舉但求公平公正，光明正大拉票，邊個輸贏都冇所謂咁話。