政情：留言網頁死Link鬍鬚曾假諮詢

新一份財政預算案明年二月二十三號發表，財爺鬍鬚曾日前開始諮詢各界意見，仲喺政府facebook專頁「上亞厘畢道」，貼上最新嘅宣傳片同諮詢網頁連結。不過，個網頁連結登咗一個鐘多啲，即時畀網民踢爆係一個「死結」，一㩒落去就發現此路不通，網頁無法顯示。咁即係拒絕接收任何意見啦，即刻畀網民鬧爆。諮詢一開波就甩轆，大家對呢份預算案都係無謂抱太大期望喇！

大搞自己形象工程

預算案諮詢片名叫《如果我是財爺》，鬍鬚曾再次粉墨登場，但曝光時間比上次「竊聽」同「攝青鬼」現身嘅次數驟減，更多時間由扮演細路、長者或一般市民嘅演員講嘢。最令人失笑嘅係，每位演員都會煞有介事咁，拎起一撇假鬚貼落自己度扮鬍鬚曾，擺明鬍鬚曾喺度搞自己嘅形象工程。

鬍鬚曾喺片末呼籲大家上諮詢網頁發表意見，有網民按下專頁上嘅連結諗住看個究竟啦，點知開極都開唔到。後來有眼利嘅網民發現，原來問題出咗喺連結「www.budget.gov.hk踴躍發表」嘅寫法上，事關個連結根本冇「踴躍發表」四個字，故此將呢四個字包括喺連結之中，自然開唔到啦！

事後政府更正番呢個手民之誤，但有網民極為不滿，炮轟「垃圾狗官，做嘢認真少少得唔得」。其實特首辦早前先至請咗兩位名為項目主任嘅facebook專員，專責管理「上亞厘畢道」，點知又爆出呢次大頭蝦錯誤，咪更加令人覺得政府亂使錢請人！

除咗連結冇反應之外，尋日包括民協馮檢基同社福界代表張國柱在內等三個立法會議員同鬍鬚曾開咗個幾鐘頭會，表達佢哋對預算案嘅意見，包括要求增加盈利一千萬元以上嘅利得稅率，以及增撥資源到教育、長者同福利方面。據與會嘅議員話，鬍鬚曾同往時一樣冇乜反應。