短打長擊：年紀愈大愈不敢病

「年紀大，機器壞」，照理說，一個人年紀大了，自然多病痛，也自然要多見醫生，甚至多入醫院；而一般普羅大眾，通常也只能入住公立醫院。筆者雖然一把年紀，但為了多笑幾聲，真有甚麼急病，我已決定不入公院。

年紀愈大愈不敢病，看似矛盾，實則心酸。話說為評核各公立醫院的服務水平，醫管局各專科定期進行審核報告，去年一份針對外科手術服務的報告顯示，約一成接受緊急外科手術的病人於三十日內死亡，近四成病人術後出現併發症。十個瓜一個，唔死一身潺，你都咪話唔驚！高官就話只願「一點春心紅到死」啫，我哋啲蟻民，只願「一支蠟燭自然熄」，千祈唔好左肺好右肺壞，一個唔覺意畀「嫩醫」亂咁篤穿好肺！又或者前列腺發炎當睾丸癌，手起刀落，恰似一江春水向東流，變成男人最痛！諗起都標冷汗！

報告指出，其中四間醫院的病人緊急手術後死亡風險特別高，另有三間醫院進行非緊急手術後，病人三十日內死亡比率亦偏高，但報告沒有交代醫院名稱。咁做法，即係欠透明度，亦剝奪病人的知情權！市民某天活得不耐煩，想話指定去死亡率偏高的公院都唔得，太豈有此理了！

英國一項調查指出，嬰兒每天會笑三百次，到十多歲時下降到約六次，到六十歲以後就只有二點五次。初生嬰兒唔知「死」字點寫，梗係成日笑啦！像筆者已過了浪漫時期，一把年紀，「因生之歷程是無限的顛簸與坎坷而愛生命」，分外珍惜那每天二點五次的笑，誓死不入公院！