安老唔係靠吹水 勿再口惠實不至

人口老化係世界各地都要面對嘅難題，香港更加無可迴避，所以咯喎，今年施政報告大談長者問題，又話要做好安老服務，又話要做好家居照顧服務，又話要採取措施方便長者回鄉養老，講到似模似樣咁，吸引就夠晒吸引喇，問題係做唔做到呢？你唔知，太一叮亦唔知。

查實，施政報告對老人家嘅最大恩惠，只不過係將生果金離港期限由二百四十日放寬到三百零五日，即係老人家每年仍需留港六十日，先至可以享受嗰區區一千元生果金，你話喇，港府係咪口惠實不至吖。尋日，政務司司長唐英年出席立法會一個關於人口政策嘅會議時繼續吹水，話當局正探討設立長者退休生活津貼嘅可行性，以方便長者返內地養老，希望以一年時間制訂初步建議喎。

叮，大家聽住先喇！港府自己都識講，二十年後，本港六十五歲或以上人口會由現時約九十萬，急增到二百一十萬，即係每四個人就有一個長者，如果家陣仲唔未雨綢繆，制訂安老政策，到時睇吓港府點死。

話時話，協助長者回鄉頤養天年，根本係有百利而無一害。大家都知，香港居住環境擠迫，空氣質素差，生活指數高，加上港府資助嘅老人院舍宿位又嚴重不足，每年唔知有幾多老人家等到死都未輪到，講起真係淒涼。相反，內地居住環境比較寬敞，空氣清新，生活指數又低，老人家用同樣嘅錢喺內地生活，比香港舒服得多。所以話，既然唔少老人家選擇返內地生活，港府應該盡量提供方便，冇理由諸多限制o架。

正如古人話齋，為長者折枝只係舉手之勞，問題係官府肯唔肯做啫。其實，當局只要撥少少資源，令長者可以喺內地安居，既方便長者，亦方便港府，又可以減輕香港社會嘅各種成本，一舉多得，何樂而不為呢？

不過咁，要令長者真正安居，唔係淨係畀少少錢趕晒佢哋入內地，然後關人個關。係人都知，內地醫院一切向錢看，唔止內地同胞要面對睇病貴、睇病難嘅問題，好多香港長者對醫院亦只能望門興嘆，所以，港府鼓勵長者返鄉下養老，首先一定要想辦法幫佢哋解決醫療問題。有立法會議員建議，當局可以向老人家派發喺內地醫院睇病嘅醫療券，或者喺香港長者比較集中嘅地方設立專門診所為佢哋服務。呢啲係好建議嚟o架，港府聽到未吖？

講到尾，要做到老有所依，老有所養，老有所為，唔係淨係靠把口講，而係要有實際行動。唐唐自己都識呢個道理，話長者為社會作出貢獻，要令佢哋能安享晚年喎。希望今次唔好再吹水唔抹嘴喇，叮！