政情：搞搞政：麒伯唔撐戴健文點彈得起

拒絕續約嘅廣播處長「麒伯」黃華麒出年二月同港台講拜拜，政府會以公開招聘形式請新處長，前幾日助理廣播處長戴健文就企咗出嚟，話有興趣申請做處長喎！佢上次都同麒伯一齊參加遴選，結果大家都知啦，若果捲土重來會點呢？

上個月政府公布配合港台發展嘅計劃，包括加開一個為期三年、由政務官做嘅廣播處副處長職位，似乎係想將為政務官坐鎮港台嘅做法常規化，同時騰出另一個副處長位畀港台中人。

麒伯同戴健文尋日一齊去立法會開會，會後問麒伯點睇戴健文有意應徵處長同處長要由公開招聘搵人，麒伯避重就輕咁話，港台一向有內部晉升嘅做法，無論副處長、助理處長同其他港台員工，當局都有規章制度，每年認真研究員工表現同升職可能，而呢次公開招聘處長，亦係當局做決策嘅！

咦！佢冇撐下屬喎，只係推番個波畀公務員事務局，言下之意係咪即係唔睇好戴健文彈得起呢？咁只有麒伯自己至知嘞！