政情：Miriam插哪吒唔念姊妹情

富貴黨嘅「哪吒」方國珊劈炮，唔止同直選拍檔田北俊「師徒」決裂，亦搞到同主席Miriam劉健儀「姐妹」鬧翻，當哪吒係妹妹嘅Miriam當晚出席田少喺港島山頂大宅BBQ聚會時仲施回馬槍，插哪吒過橋抽板，打完齋唔要和尚。

創黨元老 復出教路

田少近年每年都喺山頂大宅招待一眾骨幹黨友，今年撞啱發生連串退黨風波，BBQ聚會變英雄宴，順便凝聚軍心，開開心心玩番晚。據講，一位創黨元老前晚亦有現身，仲答應以後出席以前由田北辰帶領嘅一般事務關注組，分享直選經驗。睇嚟富貴黨正千方百計力圖翻身，盡快擺脫田二少同哪吒相繼退黨嘅負面影響。

哪吒退黨係富貴黨最新熱話，Miriam前晚同黨友講起呢位「妹妹」出走，仍然好傷感，之前心痛，前晚更加變心淡，言談間帶出一段「姊妹情」前塵往事。Miriam透露，幾個月前，有個泛民立法會議員部署出戰明年區議會選舉，擺明車馬硬撼哪吒，踩入日出康城地盤，於是Miriam幫哪吒出手，最終勸退對方。

泛民議員 否認協調

Miriam慨嘆自己攞個心出嚟對哪吒，幫埋哪吒護航競逐區議會，點知哪吒失驚無神退黨，真係好心痛。據聞，Miriam講吓講吓，仲講到眼濕濕添！

不過，嗰個泛民立法會議員接受我哋查詢時，極力否認Miriam或任何富貴黨嘅人搵過佢商量明年區議會選舉協調，指曾因租賃日出康城嘅社區會堂接見區民，因而令哪吒以為受威脅，但佢從未諗過出選日出康城，叫富貴黨咪神經過敏。

咦！呢個版本同Miriam所講嘅有好大出入喎，究竟邊個版本先至係真呢？