環保捨難取易 減排自欺欺人

環境局局長邱騰華呢頭扮環保先鋒，飛去墨西哥坎昆出席聯合國氣候變化會議噴口水，嗰頭畀本港立法會議員「缺席審判」，呢鋪直頭後欄着火咯！

立法會尋日通過一項無約束力動議，促請港府改善空氣質素。空氣愈來愈差，市民有目共睹，類似辯論進行過N次，議員提過N咁多建議，呢次亦唔例外。有議員建議引入賞罰制，吸引車主使用環保車輛，更有議員發出「哀的美敦書」，要求當局半年內推出新污染指數標準。

講開污染指數標準，簡直離晒大譜。原來本港現行污染指數標準，居然係二十年前產物。十年人事幾番新，二十年乜都變啦。咁多年嚟車多咗幾多？內地吹過嚟嘅污染物又多咗幾多？當局遲遲唔採用更嚴謹標準，好明顯係自欺欺人博大霧，等空氣污染數字冇咁難睇啫。

叮！空氣污染持續惡化，唔係玩數字遊戲就可以瞞天過海。家陣唔只喺本港做嘢嘅外國人用腳投票，向空氣污染Say No，連普通香港市民都話頂唔順。呢嗱，最近有團體調查發現，近千位受訪者入面，有四分之一表示會考慮離開香港，理由係空氣污染太嚴重，而且教育程度愈高，比例愈高。同樣得人驚嘅係，選擇離開嘅人，比兩年前同類調查高得多。

市民同樣懷疑港府改善空氣質素嘅決心，近五分之一人唔信當局會制訂同執行新嘅空氣質素標準；信政府嘅連十分之一都冇。事實證明，市民都希望港府坐言起行改善空氣質素，否則人才遲早走清光。

港府環保一向齋噏當秘笈。論成效，莫講同先進國家冇得比，就算同鄰近地區比亦差一大截。

空氣污染唔單止影響市民健康，同樣影響到本港競爭力同可持續發展能力。嗱，香港競爭力成日輸畀新加坡，梗係啦，政府部門行政效率低唔計，淨係睇兩地空氣清新程度差別，香港已經輸成條街啦。獅城經常天朗氣清，市民安居樂業；本港成日灰蒙蒙，陽光成為奢侈品，空氣更污濁到抖唔到氣，點留住人才吖？

港府搞環保一貫縮骨，捨難取易，邱騰華上任以嚟未曾做過一齣好戲，派慳電膽券幾乎令政府陷入管治危機；將清水灣郊野公園挪作將軍澳堆填區又差啲搞出憲政危機；就算推出細眉細眼嘅停車熄匙政策敷衍市民，一樣因為擾民搞成一鑊泡。

辦大事先要有決心，連新污染指數標準出台都一拖再拖，港府改善空氣質素嘅決心大極有限。計太一叮話齋，打仗輸人唔輸陣，港府連個陣都未擺好，環保呢仗一定輸硬。