政情：推廣社企騰雞美華補獲
政情：推廣社企騰雞美華補獲
舊年工展會有唔少社企擺檔，但力推社企嘅民政事務總署署長、人稱「騰雞美華」嘅陳甘美華好似發緊夢咁，對呢班社企竟然不聞不問，毫無宣傳，卒之畀啲社企鬧爆之後，騰雞美華先騰晒雞咁發新聞稿呼籲市民入場撐班社企。
被鬧爆先識郁
今屆工展會二十一號喺維園開鑼，當然亦有社企參與啦，而民政事務總署尋日就發出新聞稿hard sell，話比較過去數屆嘅工展會，今次參展嘅社企數目更多，業務範圍亦好廣泛，包括健康食品、有機農場產品同特色首飾、精品等。咁都不特止，仲加碼畀多啲着數添，話部分社企會即場派發優惠券，或提供推拿按摩服務同其他產品示範。
篇新聞稿擺明係補鑊啦！點解官員做嘢總係後知後覺，好似騰雞美華咁，硬要畀市民鬧爆先識得去補鑊？
設計圖片