政情：陳裕光力撐對員工好好

因扣飯鐘錢而惹起軒然大波嘅大家樂集團主席陳裕光話唔會捐錢畀關愛基金，仲自嘲話已經畀人標籤係無良僱主，都唔知人哋歡唔歡迎佢捐錢喎！不過佢哋平時都有向社福機構派餐券，畀啲窮人去佢哋舖頭食嘢，以後都希望做多啲。

陳裕光尋日見傳媒，無可避免又講起扣飯鐘錢事件，話成件事大家樂創辦人即係佢外父羅騰祥冇詐過型，因為佢老人家已經退隱咗二十五年，已經冇理會公司嘅嘢，所以冇煩到佢。佢本來仲有兩年就退休，半年前已放手畀班下屬打理，點知搞出個大頭佛，所以又要做番多啲。

大家樂畀人改名做「太刻薄」，令陳裕光好唔開心，覺得大家樂喺香港四十年，如果係無良就唔會屹立到今日，仲話公司對員工好好，二十年前已經有男士侍產假，仲搞置業安居貸款幫員工買樓，又資助低薪員工嘅仔女讀書，有個茶水阿姐兩個仔女就係咁讀大學仲做埋醫生添。經過今次佢形容嘅「文革式批判」，佢話都要諗吓係咪搞個平台同員工溝通多啲。