政情：Miriam聞哪吒劈炮心痛

富貴黨前主席田北俊復出，尋日即拍住黨主席Miriam劉健儀落區，向葵涌石籬邨公屋長者派暖風機同暖手包，大灑銀彈，為嘅係要顯示直選決心不變，豈料前晚突然傳出黨內最有望進軍直選嘅第二梯隊「哪吒」方國珊退黨，簡直係一盆冷水照頭淋。田少話冇察覺哪吒退黨同新界東參選排位問題有關，哪吒連民選區議員都未係，講參選立法會實在言之尚早嘞！言語間流露不悅。

Miriam就話哪吒前晚成十一點發手機短訊畀佢，話多謝兩年嘅栽培，祝佢身體健康。佢話哪吒平日根本鮮有參與黨務，唔做中常委，又唔出席商討政策事宜嘅一般事務關注組，依家先嚟話同黨嘅路線唔啱，「到底乜嘢事呢？」佢更多次強調用心同哪吒交往：「我點挽留都冇法子，我係會有心淡、會有心痛，我都有個心㗎！」佢強調咁多年盡心栽培哪吒，「我真係當佢係妹妹，我真係好痛！」

據新東地區消息透露，哪吒喺上禮拜五集思會上向黨交文件，指自己有信心勝出區議會，希望成為新東重點栽培對象，為一二年作準備，所以，佢今次係為不值失去一二年新東出戰權而劈炮，真係似層層o架。