政情：蘇錦樑盲頭烏蠅唔知碇

競爭法係立法會嘅新戰場，政府同議員枱面、枱底都頻頻過招，拳來腳往，商務及經濟發展局副局長蘇錦樑早前上立法會經濟事務委員會解畫，畀班議員輪流炮轟，原來事件仲有下文。

成為政界人士笑柄

據悉，蘇錦樑被議員轟到體無完膚後，竟然私下向委員會主席梁君彥（Andrew）訴苦，指議員嘅批評好多都冇道理，質疑點解身為會議「球證」嘅Andrew唔即時阻止有關議員發炮。更搞笑嘅係，蘇錦樑點名埋怨總商會代表林健鋒（Jeffrey）發炮太狠，論點重複兼長氣，認為Andrew應該一早封住Jeffrey把口云云。蘇錦樑呢番言論，好快喺政界傳開，聽到嘅人都為之失笑，笑指蘇錦樑太唔熟悉香港政治。

蘇錦樑簡直好似盲頭烏蠅咁四圍撞，遲早撞死！佢都唔諗吓Andrew嘅身份，除咗係經濟事務委員會主席，色彩更濃嘅背景係工業總會立法會代表，競爭法影響中小企深遠，工總一早視競爭法為仇人，去之而後快，Andrew見議員狂轟競爭法，心裏面笑都笑唔切，爭在未當場笑出聲，又點會出言阻止議員發炮呢？仲有，Andrew同Jeffrey同屬經濟動力，私下更加係老死，Jeffrey要喺會上發言狠批競爭法，係向商界選民交代，Andrew又點會唔明白呢？喺咁嘅情況下，更加唔會阻止Jeffrey發言啦，所以，蘇錦樑向Andrew投訴，係咪唔知碇呢？

建仔壁上觀唔幫拖

競爭法極具爭議性，否則政府唔使拖咗咁耐先推出嚟啦！蘇錦樑亦應該自知好難得到立法會各黨派嘅一致支持，而佢喺立法會經濟事務委員會畀商界議員圍攻，亦應該一早預料到。再者，佢嘅建仔黨友喺會議上只作壁上觀，見到如此一幕，經歷過國籍風波同卡片事件嘅佢，喺政治上可以話又上多深刻一課。不過，政治呢門藝術的確深奧弔詭，上完堂有時都未必學到嘢，蘇錦樑就係人辦。