短打長擊：周一嶽廢噏激起千重浪

食物及衞生局局長周一嶽喺官場打滾咁耐，竟然毫無官場智慧。

公立醫院經常人手不足，不少實習醫生須七日通宵四晚或九日通宵五晚，每周工作逾百小時。伊利沙伯醫院骨科女實習醫生，據悉本月獲編排通宵當值八次，她上周三連續工作三十小時，休息一晚後，周五早上又要直踩通宵更，終於在周六凌晨暈倒，且一度危殆。

然而，周一鑊在回應今次事件時竟說「工時唔算長」！周一鑊一句話激起千重浪，社交網站facebook出現名為「我經常於醫管局當值超過30小時」群組，逾三百人加入；亦有「反對周一嶽冷血言論」群組助轟，周一鑊腹背肯定如蜂巢。

周一鑊可能有點腦退化，要不然，怎會連官場流行用語都忘了，像「需要時會採取相應的措施」。總之，「刷刷刷」虛晃幾招，冇幾多人會記得你講過乜嘢廢話、做過乜嘢惡行！唉！歲月催人，一年容易又聖誕，容乜易又到退休。

前線醫護人員做到快斷氣，你身為頂頭上司，竟然廢噏「工時唔算長」，阿哥，你講緊自己呀！人哋做到暈、做到危殆，你唔講「高度重視」都應該搬個「嚴肅處理」嚟應急吓啦！你唔重視醫護人員嘅超時工作，換言之，即係輕視啦！

雖然周一鑊冷血，但如果肯講出「嚴肅處理」這四字真言，前線醫護人員就算一周工作過百小時，相信冇人會覺得你逃避「應有之義」！周一鑊，公立醫院給人的印象已經夠差，你再亂噏，隨時被轟下台！