政情：大輝鋪定路轉軚撐申亞
政情：大輝鋪定路轉軚撐申亞
政府申辦二○二三年亞運會可謂峰迴路轉，各黨派本來企硬群起反對，但繼工聯會尋日正式轉軚支持後，廠商會嘅立法會代表林大輝亦鋪定路轉軚。
大輝尋日喺立法會走廊自爆，民政事務局長曾德成本周一主動搵佢作最後游說，仲足足畀佢「轟炸」咗一個鐘，用大輝嘅話說：「你都知佢講嚟講去都係嗰啲嘢㗎啦。」佢意猶未盡，話申亞唔係德成局長一個人嘅事，如果政府可以團結一致，認真處理本港長遠體育政策嘅話，佢作為一個熱衷體育嘅人，感性上同理性上都會支持申亞。咁講法，似乎為轉軚留一線喎！
不過，即使大輝轉軚都冇用，事關申亞成敗最重要睇建仔嘅關鍵九票。建仔企硬反對，商界代表林健鋒尋日就度咗條橋，話如果政府喺賽事後將選手村改建為置安心或居屋，再將佢哋出售畀市民，變相復建居屋，咁就可以逼到建仔焗住支持喎！