政情：搞搞政：葉劉廣納百元黨員

尋日都講過，匯賢智庫創辦人兼立法會議員葉劉淑儀組織嘅「新民黨」下個月舉行創黨大典，但依家只有幾十個黨員似乎人腳太少，但葉劉就一啲都唔擔心。原來葉劉暗中廣發英雄帖，大派黨員申請表格，邀請各界人士，包括退休公務員、紀律部隊舊部下同專業人士參加。咁點樣先可以成為黨員呢？吸客當然要有優惠喇！好簡單，最低消費盛惠每年一百大元就可以入黨，全職學生同非在職人士更可獲半價優惠，畀一千蚊仲可以成為終身會員，認真抵玩。

其實，新民黨個名有段古，就係嚟自《禮記．大學》篇嘅「大學之道，在明明德，在親民，在止於至善」，宋儒朱熹將「親民」改為「新民」，咁「新民」係咩意思？就係先要有偉大嘅人格，然後推己及人、教化民眾，關心、教育同改革社會，聽落都幾偉大噃！聞說南韓同台灣都曾經有政黨以新民黨命名，命運就各異；至於個黨徽，好明顯係英文字母「Ｎ」字，即新民黨New People's Party嘅簡寫。