政情：田二少唔飲廿蚊張嫁女酒

富貴黨嘅立法會飲食界議員「廿蚊張」張宇人尋晚嫁女，正、副主席劉健儀同方剛，以及兩位黨內精神領袖田北俊同「莎姐」周梁淑怡齊齊到賀，為富貴黨沖喜。之不過，剛辭去新界東支部主席嘅「哪吒」方國珊尋日決定，今日搞埋手頭上嘅工潮行動，傍晚就會正式申請退黨。唉！又地震。

呢場喜宴早喺田北辰退黨前已安排，就算廿蚊張同田二少嘅政治理念如何南轅北轍，總算相交一場，所以亦有派帖畀田二少。其後田二少退黨，鬧得不歡而散。黨中人事前已知田二少唔會嚟飲廿蚊張嘅喜酒，而且田二少尋日仲身在香港添。田二少點解唔捧場？背後可能有政治訊息事，唔通田二少決定同富貴黨完全割席，老死不相往來？

黨友嫁女，田少喜形於色，但另一場嫁娶婚事就搞到佢好唔得閒，就係胞弟田二少商談「改嫁」匯賢智庫主席葉劉淑儀籌組嘅新黨嘞。田少出山，富貴黨即時有錢做嘢，現計劃落區「開檔」，成立七個地區辦事處，以示直選決心不變，今日頭炮落葵涌派暖風機。