政情：林公公趁亂遮醜

尋日無論係政、商同財經界嘅新聞都爆到七彩，點解會堆埋一齊爆，心水清嘅人都睇得到有人博大霧。

眾所周知，立法會調查梁展文事件嘅報告尋日公布，而主席李鳳英喺立法會大會上交代報告後就召開記者會，中午向傳媒解答報告得出嘅結論，但與此同時，咁啱政府相關部門通知話喺政府總部有簡報會。

初時以為唔係煲呔曾就會係畀報告鬧到飛起嘅公務員事務局局長「D姐」俞宗怡出嚟解畫啦，點知完全唔係！勢估唔到竟然係政制及內地事務局局長「林公公」林瑞麟，話喺行政會議前日拍板通過後，尋日公布向立法會提交兩條政改本地立法草案，喺聽日就會刊憲。

老實講，行政會議前日朝早只係開咗一粒鐘，剩低成日咁悠悠長，林公公都唔知做乜？亦可以揀尋日下晝或者今日出嚟講，都趕得切聽日刊憲，點解佢偏偏揀撞正調查梁展文事件報告嘅記者會先出嚟講，肯定有蠱惑啦！

韋奕禮亦乘機自爆劈炮

林公公簡介草案嘅其中一Part係話會修例，令到喺《領事關係條例》（第557章）嘅領館等，唔再合資格登記成為下屆立法會團體選民，即係冇得投票。

若果大家唔健忘嘅話，早前林公公仲力撐呢啲駐港領事館嘅人員可以登記做選民，既合法亦冇違憲，依家自己打腫塊面走出嚟話唔得，預計會畀外界鬧爆，咁佢揀正同調查梁展文事件時報告記者，搞到傳媒四圍撲，電子傳媒又趕唔切午間新聞，咁對佢嘅殺傷力咪細好多囉。雖然林公公擺明係借梁展文事件嚟遮醜，但都甩唔到身，照樣畀傳媒抽佢後腿，咪一樣咁醜！

除林公公外，仲有一個疑似借梁展文事件降低公眾關注嘅人，就係尋日下晝公布提前離任嘅證監會行政總裁韋奕禮。正如佢親口講雷曼係佢喺任內好艱巨嘅工作，就因為立法會仲調查緊雷曼事件，若果等臨近報告出先話唔撈，可能會惹人遐想，以為佢被轟下台，所以趁咁嘅風頭火勢咪自爆埋提前離任囉，咁就冇咁顯眼嘞！