有膽賣國冇膽認 可笑漢奸扮失憶

孔子曰，「老而不死是為賊」。呢句說話本來唔係鬧老人家嘅，不過咁，喺現實生活中，確實有種人係老而不，例如大名鼎鼎嘅李漢奸就係其中嘅人辦喇。

李漢奸雖然已退出政治舞台，連一手創立嘅白鴿黨亦幾乎唔受佢玩咁滯，但佢不甘寂寞，耐唔耐仲要出嚟獻吓世。呢，尋日李漢奸又接受電台訪問，聲稱畀人叫漢奸係好大件事，自言「我憑咩資格出賣國家」，仲反咬鬧佢係漢奸嘅人無理取鬧，要求大家「拿出證據」喎。叮！睇嚟李漢奸唔止老而不，仲失憶添！

李漢奸要求拿出證據吖嘛，咁就易喇，太一叮信手拈來，不妨舉幾個例子幫佢恢復記憶。一九八八年佢話：「如果香港繼續做一百年英國殖民地，我想很多人認為是最好的」；一九八九年佢又話：「英國將香港主權交還中國，就像第二次世界大戰把五百萬名猶太人交還給納粹德國」。

更離譜嘅係，一九九九年，以美國為首嘅北約以導彈襲擊中國駐南斯拉夫大使館，激起全球華人憤慨，李漢奸居然充當美國代言人，喺立法會上聲稱事件只係誤炸，仲反指內地同胞對戰事背景無知。當《東方日報》「功夫茶」痛斥佢嘅漢奸言行時，佢惱羞成怒，指使佢老友、刑事檢控專員江樂士，要求警方以「刑事煽動罪」調查《東方日報》添。

如果李漢奸真係失憶，唔記得咁多年前嘅事，咁三年前佢喺美國《華爾街日報》發表文章，要求美國總統布殊藉北京奧運向中國施壓，迫使中國改善人權，咁記得喇啩！

叮，其實李漢奸邊度係失憶吖，扮失憶啫嘛。漢奸呢個狗牌佢掛咗十幾廿年，不嬲都好享受，曾經得意忘形話「舒服晒」，甚至公開聲稱「你話我做漢奸，我日日做漢奸，有需要時做漢奸」。嗱，呢啲全部係佢親口講㗎，有白紙黑字為證，絕對冇冤枉。

正所謂人怕出名豬怕肥，李漢奸臭名遠播，連《人民日報》亦曾指名道姓數臭佢嘅賣國言行。不過話時話，黨報鬧還鬧，五年前全體立法會議員獲邀訪問廣州，李漢奸唔止受到貴賓式接待，仲同時任中共中央政治局委員、廣東省委書記張德江同枱食飯，都唔知幾受歡迎。難怪有人話，愛國冇前途，賣國有運行。

最好笑嘅係，李漢奸喺廣州同張德江杯上杯落，觥籌交錯，點知一返到香港就破口大罵，乜嘢圈套吖、暴君吖，正式係完唱，搞到北大人賠了夫人又折兵，乜嘢面都冇晒。

叮，今時今日北大人講和諧，香港又實行一國兩制，洋奴漢奸個個名利雙收，既然係咁，李漢奸又怕乜嘢認噃，佢唔止可以繼續日日做漢奸，甚至可以更上一層樓，競選埋特首添！