Sun世代：落難少爺發功變動畫大師

資深動畫師鄧日昇曾經是有錢仔，但家道中落，落難少爺生活艱難到要自殺。跳樓前靈光一閃，想起母親，最終回頭是岸，立志要在動畫業發揮所長。如今成為動畫大師，也擔當春風化雨的教師，以絕地反擊的經歷，教導及鼓勵被社會遺忘的青少年：「我曾被人放棄，唔容易走番上嚟，想畀機會呢班同我經歷相似年輕人！」

鄧日昇（Sunny）有個開貿易公司的父親。讀書時他每日一千元零用錢，但仍然不夠用，竟從老竇錢包拿走「金牛」，買遊戲碟、模型和漫畫，每日入戲院看兩套電影，用錢填滿娛樂世界，他自嘲：「我真係敗家仔、二世祖。」

「人人覺得我冇得救」

好景不常，上天提早結束他的荒唐歲月。九七年金融風暴，父親生意失敗，欠下三千萬元巨債，卻一走了之。債主臨門，淋紅油、恐嚇，當時十五歲的Sunny，迫不得已與母親和妹妹，離開千呎獨立屋，開始走難生涯，匿得就匿。

別人說長兄為父，可是Sunny卻是全家「最冇用」的一個：「媽咪、妹妹各有親戚收留，剩低我無，因為我讀唔成書，淨係識玩，會考七分，中英文『肥佬』，人人覺得我冇得救。」難關激不起鬥志，反而更放縱：「做散工維生，搵到錢就去玩，玩到第二朝唔返工，試過身上一蚊都無。」

人到絕境，Sunny蠢到想一「死」了之：「想去跳樓，但嗰刻突然好多畫面閃動，如果我死咗，會為媽咪帶來更多問題。」去不成鬼門關，帶回來一團火。Sunny決心扭轉頹勢，「我最熟係電影、卡通和動畫，不如諗計發展！」朋友介紹下，得到月薪四千元網頁設計學徒工作，電腦白癡Sunny要花上更多時間學習，不停看書，放工後仍留在公司試整網頁，終短短三個月設計逾二十個網頁而獲賞識，成為行內挖角對象：「一年半內轉咗四間公司，人工跳升到萬幾蚊！」

豈料科網爆破，事業剛起飛又失業。他不再自暴自棄，修讀動畫設計夜間課程，務求轉型。日間做動畫freelance賺錢，夜間到城市大學上課，日睡三小時。畢業後，連大學也賞識，他獲邀做導師。就這樣，曾迷失方向的年輕人，破天荒成為春風化雨的教師。

「好多學生有我影子」

一份教席令Sunny再次思考人生價值：「好多學生有我嘅影子，信心不足，自覺無長處，我曾被人放棄，唔容易走番上嚟，想畀機會呢班同我經歷相似年輕人！」這位非常教師與別不同，不板着臉，不高高在上：「我唔係教師，而係佢哋嘅朋友，傾學業也傾人生，我鼓勵佢哋去同人分享學到嘅嘢。我見到學生畢業後搵到動畫工作，我好開心！」

Sunny現時在天比高創作伙伴賽馬會策動創新思維，擔任動畫部門導師，繼續實現培育動畫新星的目標，但謙稱並非迷途羔羊的救星：「有興趣做動畫創作嘅年輕人可以嚟參加免費課程，但我唔係執佢哋返嚟，只係想提供平台，畀佢哋發揮自己長處！」年僅二十八，Sunny已經歷人生起跌，其積極不放棄的人生態度，更當選香港精神大使，經常獲邀出席分享會，實行以正能量感動年輕人。

鄧日昇小檔案

年　　齡 ： 28歲

現　　職 ： 天比高創作伙伴賽馬會策動創新思維動畫總監

學　　歷 ： 城市大學專業進修學院電腦動畫專業文憑

個人及團體獎項

2010年香港精神大使、第三屆香港流動影片製作比賽最佳動畫及最佳剪接、金媒體全國最受歡迎獎、2009年香港資訊及通訊科技獎最佳數碼娛樂（學生及獨立組）銅獎、第十一屆DigiCon6大賞努力獎