政情：搞搞政：李少光解畫爆炸彈
政情：搞搞政：李少光解畫爆炸彈
呢排維基解密不斷踢爆多國嘅外交醜聞同機密檔案，令多國政府尷尬不已，港府都不能幸免，被指隱瞞喺香港奧運馬術賽期間可能遭受恐怖襲擊嘅情報。
保安局局長李少光尋日主動解畫，點知又講錯嘢，口快快咁以「某日如果我哋收到國泰航空公司有個炸彈……」做比喻，原意係指政府唔可以未經分析就貿貿然公布各項保安情報，不過對於國泰嚟講，就真係多得佢唔少。
相信光哥當時只係諗住攞呢個比喻嚟拆彈，點知反而自己嘔咗個炸彈出嚟，仲隨時炸番自己。咁點收科呢？新聞處其後為佢出稿時，特別剔除咗「國泰」兩隻字，變咗做「某航空公司」，算係幫佢補番隻鑊喇。之不過，啲電子傳媒將呢段片播足全日，新聞處想幫佢甩身都好難。