政情：蘇菲衰多口畀團體圍插

立法會發展事務委員會上個月搞公聽會傾《巿區重建策略》，點知撞正政府授勳大龍鳳，好多議員遲大到搞到流會收場，雖然會議開咗一粒鐘後齊人重開，但已激嬲一班團體，仲拉隊離場抗議。

尋日重搞公聽會，上次唔到嘅發展局局長林鄭月娥坐定定聽團體打油詩、數白欖乜都出齊，即使團體夾定將同一番意見輪流重複講十幾次，主席劉秀成都由得佢哋講，上次有份遲到嘅經濟動力嘅「蘇菲」梁劉柔芬喺會議結束前抵唔住頸批評，話立法會盡量希望吸納民意，但希望巿民嚟到可以安靜表述，而唔係「做埋啲太過好似唔係幾公道嘅表演或者之類嘅嘢」，因為會得不償失，希望委員會傾吓呢個問題。

此言一出，在場嘅團體代表即群起攻之，反問蘇菲識唔識尊重言論自由，又諷刺佢今次都遲到半個鐘，唔知係咪食埋飯先嚟；仲話若佢直選，一定叫街坊唔好投佢。有幾位愈講愈激，愈行愈近蘇菲，搞到保安即刻築起小型人牆保護佢。