政情：葉劉話田二少創黨現身
政情：葉劉話田二少創黨現身
匯賢智庫創辦人兼立法會議員葉劉淑儀組黨一事已成定局，佢尋日話敲定下月九號搞新黨成立典禮，到時會同大家介紹新黨高層同創黨成員，包括兩名黨副主席，而富貴黨前常委田北辰係咪正式「嫁入」葉劉嘅新民黨，屆時自有分曉。不過，葉劉就率先漏口風，話成立典禮當日，田二少「肯定會到」，仲神神秘秘咁話會有星級人馬出席，但就唔肯講係邊個。
依家新民黨創黨黨員只有幾十人，同葉劉早前講嘅三、四百人有一段距離，但佢一啲都唔擔心，因為連佢都未交入會表格，相信建立好黨內架構後，到時人數一定會達標。
睇番通勝，發現一月九日宜訂盟、掛匾，相信葉劉揀呢日開張都係諗過度過，希望新黨事事順利。