政情：李柱銘玩失憶唔認做漢奸

外號「李漢奸」嘅民主黨創黨主席李柱銘，畀人叫足漢奸十幾年，早前先講過好享受呢個稱呼，得意忘形到話畀人叫做漢奸令佢「舒服晒」，甚至可以「日日做漢奸，有需要時就做漢奸」添！

唱衰中港 死撐無錯

不過李漢奸尋日接受電台訪問時，就好似忽然失晒憶咁，態度仲一百八十度轉變，話畀人叫漢奸係好大件事，自言「我憑咩資格出賣國家」，反咬鬧佢係漢奸嘅人無理取鬧，要求大家「拿出證據來」喎。

李漢奸強調批評國家係憲法賦予嘅權利，唔可以因此就話佢係漢奸。對於被指勾結外國勢力同到外國唱衰中國，佢反指首先將香港問題國際化嘅係中國，如果中國做得好佢周圍唱衰都冇人信，繼續死撐自己做得啱，死都唔會放棄。

其實李漢奸嘅「漢奸之路」真係路人皆見，就連尋日嘅電台節目主持人都引述《人民日報》鬧佢係漢奸嘅報道，唔係李漢奸唔認帳就冇咗回事。

九九年以美國為首嘅北約轟炸中國駐南斯拉夫大使館，引起國民激憤，李漢奸就辯稱只係誤炸，叫大家要將轟炸事件同南斯拉夫總統犯下嘅罪行分開，「漢奸」之名不脛而走。○四年佢出席美國參議院關於香港民主狀況嘅聽證會時，又力數香港不是，先令《人民日報》指名道姓批評佢。

雖然內地鬧佢漢奸，不過○五年政改前夕，全體立法會議員獲邀上廣州時，李漢奸竟然都喺邀請之列，仲獲時任中共中央政治局委員、廣東省委書記張德江高規格接見，齊齊坐主家席食飯。點知李漢奸一返到香港就喪鬧是次訪問團係一個圈套，名副其實係完唱，令中央硬食咗一記悶棍！李漢奸依家名利雙收，又喺政壇同法律界培植咗大批徒子徒孫，就算忽然失憶講過又唔算數，中央都奈佢唔何。