政情：港區人大踩上門 傻強十二．五考試

相信大家仲記得○六年初內地通過咗「十一．五」規劃綱要之後，特區政府呆若木雞咁，了無反應，即係特區政府對呢瓣根本唔懂。據講當時中央對此甚為不滿，之後煲呔曾先至臨急抱佛腳，搞咗場經濟高峰會，同各界研究點樣配合「十一．五」規劃。

事過境遷，又嚟到「十二．五」規劃，金融範疇成為今次嘅重中之重，為免特區政府冇吸取教訓，再度慢半拍，港區全國人大代表索性採取主動，由經濟小組召集人劉佩瓊牽頭，約咗有「傻強」之稱嘅財經事務及庫務局局長陳家強同副局長梁鳳儀尋日開會，一開就開足兩粒鐘。表面上係交流，實情係攞料，睇吓特區政府做緊乜。

有人大代表話，以往間唔中都有同特區政府官員會面，但講到好似尋日咁，成班人正正式式去見就冇嘞！雖然呢位人大代表形容，尋日嘅會面談唔上係鞭策政府，但佢都話目的係想睇吓人大有啲乜嘢幫得上忙。

上海隨時迎頭趕上

有人大代表亦喺會上表示關注因為○八年金融海嘯而衍生嘅內地金融安全問題，據聞班人大希望遲啲做好建議後，會喺出年三月全國人大、政協兩會時向國家提出。

老實講，外界不斷批評特區政府唔了解國情，尤其擔心上海發展為金融中心對香港威脅好大，若果特區政府仲係懶懶閒咁對待「十二．五」規劃，香港就死梗嘞。好明顯若果特區政府自己真係搞得掂嘅話，又何須咁多位人大代表操心，搞到佢哋要主動摸上門，仲開聲問傻強同梁鳳儀有冇嘢要幫手，擺明係幫佢哋惡補啦！就算今次特區政府比上次積極咗啲，班人大都要去了解特區政府搞成點至放心。

另一位人大代表都覺得，特區政府肯向前走點都好啲嘅，而且人大同政府一齊做，大家有個共同目標，始終係一件好事。講到呢度，一眾人大代表嘅用心良苦，相信都呼之欲出啦！至於「十二．五」規劃涉及咁多個範疇，佢哋又會唔會逐個局敲門呢？呢位人大代表就話暫時未能肯定。