鏹魔逍遙已失威 縱火又剃警眼眉

尋日清晨，有縱火狂徒喺旺角花園街一帶三度縱火，釀成三級大火，火勢一發不可收拾。近百個排檔被焚毀，鄰近三十幾個地舖及低層單位亦被大火波及，成條街濃煙滾滾，逾二百名居民緊急疏散，有六人受傷送院。

狂徒絕對唔會係等閒之輩，先將太子道後巷一堆雜物燒着，引消防員過去撲救，啱啱將火救熄，花園街小販區兩個排檔就同時起火，令消防員疲於奔命。

連環縱火案喺古惑仔電影裏面就見得多嘞，不過當呢種場面出現喺眼前嘅時候，真係令人毛骨悚然，都咪話唔驚。好好一個攤檔，眨吓眼就燒成灰。如果救得遲啲，畀火燒上住宅樓宇，唔知幾多人一鑊熟。最慘仲係嗰啲小商販，臨近聖誕零售旺季，好多人都大批入貨，仲諗住豬籠入水添，點知一把火燒到渣都冇得剩。

更得人驚嘅係，案發地點就喺旺角警署附近，狂徒大模廝樣作案，擺明係剃警方眼眉。不過，犯罪人士喺警方眼皮底下作案，都唔係第一次嘞。嗱，舊年有不法之徒喺旺角、深水埗等地掟鏹水彈，傷及大批途人。警方裝天眼監視，佢哋就專揀天眼嘅死角作案，激到警方生蝦咁跳。警方冇晒符，惟有起勢提高懸紅金額，可惜重賞之下冇勇夫，鏹魔仲係逍遙法外。

家陣鏹魔未除，縱火狂徒又現身，香港唔通真係進入咗無警時分？如果警方今次仲係唔嗲唔吊，任由縱火狂徒逍遙法外，唔單止香港市民生命財產冇保障，仲會威脅旅遊業發展。

旺角花園街一帶係本港鬧市區，係外地遊客必到之處，但係家陣變咗九反之地，遊客冇安全感，邊個仲敢嚟呀？咪以為太一叮嚇你，舊年有鏹魔喺旺角一間大廈嘅天台向大街掟鏹水彈，令幾十名途人中招，其中就有好多係外地遊客，有外國人，亦有內地同胞。仲有，如果花園街呢場三級火喺白天遊客最多嘅時候發生，恐怕受傷嘅就唔止幾個人，講唔埋仲會有遊客葬身火海。

咁就弊傢伙嘞。早前菲律賓馬尼拉發生人質事件，香港遊客八死七傷，港府即刻勸喻市民唔好去菲律賓，如果香港發生遊客被燒死事件，你估其他地區政府會唔會照辦煮碗吖嗱？

或者咁啦，港府先小人後君子，昭告天下，凡來港旅遊者，請自備鋼盔同防火衣，否則來港後受鏹彈襲擊或身陷大火，造成生命財物損失，後果自負。叮佢個鎯鎯！