政情：搞搞政：工聯會內外夾攻積金局

推行十年嘅強積金制度千瘡百孔，打工仔筆退休金真係冇乜保障。○八年底金融海嘯爆發，股市急瀉，工聯會嘅立法會議員葉偉明份強積金結算損晒手，事關佢嘅投資組合屬「超級進取型」，兩個月前先勉強收復失地。投資可升可跌，風險自負，強積金戶口最令佢心寒嘅係佢睇咗大半日，都唔知中介人收咗佢幾多管理費，等如打開荷包任人魚肉。

積金局最快年底就規管銷售強積金中介人推出諮詢文件，目標趕及明年提交立法會審議。葉偉明話由佢擔任副主任嘅工聯會轄下權益委員會，將會要求現時「四不像」嘅強積金進行連串改革，首炮係要求為中介人收取管理費「封頂」同增加透明度，佢會約見積金局主席胡紅玉，嚟個先禮後兵；而佢嘅戰友議員、身兼積金局董事嘅KK黃國健就喺積金局內力陳利害，內外夾擊積金局。

據聞，胡紅玉上任積金局主席年半以嚟好似「宅女」咁，可能諗住KK係積金局董事，工聯會副會長梁富華係積金局諮詢委員會委員，搭通天地線，所以至今未約過工聯會另外三個立法會議員見面，即係冇溝通啦，工會咪惟有踩上門囉！呢次畀工聯會夾擊，多少係胡紅玉自招嘅，睇吓佢仲點匿。